მოწამეთობა, ორწიფობა — სახალხო-რელიგიური დღესასწაულია, რომელიც იმერეთში, მოწამეთას მონასტერში, საქართველოს მართლმადიდებელი ეკლესიის მიერ წმინდანებად შერაცხული არგვეთის მთავრების- დავით და კონსტანტინეს (VIII ს.) ხსენების დღეს, ყოველწლიურად 15 ოქტომბერს აღინიშნება. ტრადიცია ცნობილია XVIII საუკუნიდან.
გადმოცემის მიხედვით, მოწამეთა სწორედ იმ ადგილზეა აშენებული, სადაც დავითი და კონსტანტინე მურვან ყრუს შემოსევის დროს აწამეს. ამ დღის აღსანიშნავად მორწმუნენი იმერეთში საქართველოს სხვა კუთხეებიდანაც ჩადიან. მათ შეუძლიათ გაიარონ მოწამეთას ტაძრის გვირაბში, სადაც, ტრადიციულად, სურვილის ჩაფიქრების შემდეგ პატივს მიაგებენ დავით და კონსტანტინეს წმინდა ნაწილებს.
