გელათის სამონასტრო კომპლექსში არსებული დროებითი გადახურვის მოხსნა გაზაფხულიდან დაიწყება. 

საპატრიარქოს ინიციატივით შექმნილი რეაბილიტაციის დროებითი კომიტეტის წევრები დღეს გელათში იმყოფებოდნენ. მათი განცხადებით, ამ დროისთვის მიმდინარეობს ლოჯისტიკური სამუშაოები მონასტრისთვის ერთიანი დროებითი გადახურვის მოსამზადებლად.

კომიტეტის სამეცნიერო საბჭოს ხელმძღვანელი დავით ლორთქიფანიძე ამბობს, რომ პროექტი, რომლის საფუძველზეც გელათის სამონასტრო კომპლექსის რეაბილიტაცია უნდა განხორციელდეს, იუნესკოში არის გადაგზავნილი.

ლორთქიფანიძის თქმით, მონასტრის გადახურვა გაზაფხულზე დაიწყება. სწორედ ამ დროს მოიხსნება არსებული დროებითი გადახურვა, რომელიც დაზიანებული ფრესკების გამოშრობას უშლის ხელს.