საჩხერე ქალაქის დღესასწაულს აღნიშნავს. “საჩხერლობის” ფარგლებში, მთელი დღის განმავლობაში თავისუფლების ქუჩაზე, სხვადასხვა სივრცე ყველა თაობის ადამიანს მასპინძლობს. ატრაქციონები, ანიმატორები, ცოცხალი ქანდაკებები, მიმები, ოჩოფეხები, სახის მოხატვა, საპნის შოუ, დრამერების შოუ-საბავშვო გასართობი ეს სივრცეები პატარებისთვის არის მოწყობილი.
სამოყვარულო-სპორტული თამაშობები იმართება ნარდში, ჭადრაკში, მაგიდის ჩოგბურთში, ქართულ ჭიდაობაში, მკლავჭიდსა და კრივში.
საზეიმო ღონისძიებაში მონაწილეობენ ადგილობრივი შემოქმედებითი ანსამბლები და ინდივიდუალური შემსრულებლები. მიმდინარეობს იმერული ღვინისა და ადგილობრივი სოფლის ნობათის, კულინარიული ნაწარმის გამოფენა-გაყიდვა.
“საჩხერლობის” ფარგლებში გაიმართება საჩხერის საპატიო მოქალაქეების დაჯილდოვების ღონისძიება. დღესასწაული გალა კონცერტით დასრულდება.
