28 ივლისს (ახ.სტ.) კვირიკობის დღესასწაული, წმიდა მოწამეთა კვირიკესი და მისი დედის, ივლიტას ხსენების დღე აღინიშნება.

"ქუთაის-გაენათის ეპარქიის სოფელ ზარათისა და სოფელ ტყაჩირის (წყალტუბოს მუნიციპალიტეტი) წმიდა მოწამეთა კვირიკესა და ივლიტას სახელობის ტაძრები.

სოფელ ზარათში მდებარე ტაძრის აგების თარიღად მიჩნეულია მე-13 საუკუნე. ტაძარი ერთნავიანი ბაზილიკაა და შემკულია მე-17 საუკუნის ფრესკებით. 

სოფელ ტყაჩირში მდებარე ტაძარი 1907 წელს აკურთხა იმერეთის ეპისკოპოსმა (შემდგომში სრულიად საქართველოს კათოლიკოს-პატრიარქი) ლეონიდემ (ოქროპირიძე). ტაძარი დარბაზული ტიპისაა, დასავლეთ ფასადზე მიდგმული სამრეკლოს თანხლებით. 

აღნიშნული ტაძრები, საბჭოთა რუსული ათეისტური მმართველობისას, ადმინისტრაციული წესით იყო დახურული. ორივე მათგანის ენკენია (განმეორებითი კურთხევა) აღასრულა ქუთათელ-გაენათელმა მიტროპოლიტმა კალისტრატემ (მარგალიტაშვილი), სოფ. ზარათის ტაძრის - მე-20 საუკუნის მიწურულს, სოფ. ტყაჩირის ტაძრის - 2008 წლის 14 მაისს,"-წერს თეოლოგი ლაშა დეისაძე-შერვაშიძე.