ქუთაისის საკრებულოს თავმჯდომარე ირაკლი შენგელია მოქალაქეების წინაშე ანგარიშით წარდგა.
საკრებულოს თავმჯდომარის ანგარიშს სახელმწიფო რწმუნებული ზვიად შალამბერიძე, ქალაქის მერი იოსებ ხახალეიშვილი, საკრებულოს თავმჯდომარის პირველი მოადგილე გია ბასილაძე, საკრებულოს თავმჯდომარის მოადგილე თეიმურაზ ნადირაძე, ასევე წარმომადგენლობითი და აღმასრულებელი ორგანოს წევრები დაესწრნენ.
საკრებულოს თავმჯდომარემ ისაუბრა როგორც წარმომადგენლობითი ორგანოს მუშაობის შესახებ, ასევე საკრებულოს აპარატის სტრუქტურული ერთეულების გამართულ ფუნქციონირებაზე.
"ანგარიშზე პრეზენტაციის სახით წარმოდგენილი იყო პროექტები, რომელიც მიმდინარე წელს საკრებულოს მიერ იქნა მოწონებული.
პრეზენტაციის დასრულების შემდეგ კითხვები დაისვა დამსწრე აუდიტორიიდან, რომელსაც პასუხი გასცა, როგორც საკრებულოს თავმჯდომარემ, ასევე სახელმწიფო რწმუნებულმა და ქალაქის მერმა,"-აცხადებენ საკრებულოში.
"დღეს გამართული ანგარიში ნათელი მაგალითია იმისა თუ რამდენად პროგრესულად მოაზროვნე ახალგაზრდა თაობა გვყავს ქალაქში. ესენი არიან ადამიანები, რომლებიც თამამად აფიქსირებენ საკუთარ მოსაზრებებს და მაღალი მოქალაქეობრივი პასუხისმგებლობით ცდილობენ არსებული პრობლემების მოგვარებას.
დღეს კიდევ ერთხელ დავინახე ის სულისკვეთება, რომელიც თითოეული მათგანიდან მოდის. მინდა მადლობა გადავუხადო ყველა მათგანს, გამოჩენილი ინტერესისთვის და აქტიობისთვის. ასევე მადლობა მინდა ვუთხრა ჩემს კოლეგებს აღმასრულებელ რგოლს, სამხარეო ადმინისტრაციას და ყველა იმ ადამიანს, რომელმაც დღეს ინტერესი გამოთქვეს მოესმინათ ჩემი როგორც საკრებულოს თავმჯდომარის და როგორც მაჟორიტარი დეპუტატის ანგარიში.
ანგარიშვალდებულება, ღიაობა და მოქალაქეთა ჩართულობა არის დემოკრატიის მთავარი პრინციპები, რომელიც ქმნის იდეოლოგიურ ხიდს და კიდევ უფრო მჭიდროდ აკავშირებს ხალხს ადგილობრივ ხელისუფლებასთან,"-ამბობს
ქუთაისის საკრებულოს თავმჯდომარე
ირაკლი შენგელია.
