ამბროლაურისა და ონის დამაკავშირებელ გზაზე გზის ნაწილი ჩაინგრა. 

აღნიშნული მიზეზით, გზის 107-ე კმ-ზე, დროებით იკრძალება ყველა სახის ავტოტრანსპორტის მოძრაობა.

გზის სავალი ნაწილის აღდგენის მიზნით, ამ დროისთვის  ტექნიკის მობილიზება მიმდინარეობს. 

"ჩემმა მანქანამ გაიარა, ამბროლაურში ჩავედით, საწვავი ჩავასხი, გამოვბრუნდი და გზა ამ მდგომარეობაში დაგვხვდა. მანქანა ზუდალში დავტოვეთ და ფეხით გადმოვედით,"-ამბობს ერთ-ერთი ადგილობრივი. 

დაზიანებული გზის მონაკვეთზე ვითარებას ადგილზე გაეცნენ ცენტრალური და ადგილობრივი ხელისუფლების წარმომადგენლები.