პარლამენტის რეგიონული პოლიტიკის კომიტეტის თავმჯდომარის მოადგილე ზვიად შალამბერიძე პრეზიდენტს მიმართავს.
“ქალბატონო პრეზიდენტო!
თქვენი ბოლო პოსტი სოციალურ ქსელში, რომელშიც თქვენ პოლიციის თანამშრომელს, რომელიც ყველაზე რთულ პირობებში იცავს საზოგადოებრივ წესრიგს, ნარკოტიკების მოხმარებაში ადანაშაულებთ. ეს სერიოზულ შეკითხვებს აჩენს. მსგავსი განცხადებები, რომლებიც საჯაროდ და ყოველგვარი მტკიცებულებების გარეშე კეთდება, არა მხოლოდ უპასუხისმგებლობას ავლენს, არამედ მიზანმიმართულად აკნინებს სამართალდამცავი ორგანოების რეპუტაციას და მათ მორალურ მდგომარეობას.
გთხოვთ, გაითვალისწინოთ, რომ პოლიციის თანამშრომლები მუშაობენ ექსტრემალურ პირობებში. ისინი საათობით დგანან სიცივეში, სრულ ეკიპირებაში, იცავენ მოქალაქეების უსაფრთხოებას და წესრიგს. დაღლილობა, ფიზიკური დაძაბულობა და მიმიკა, რომელსაც თქვენ ასე ერთმნიშვნელოვნად განმარტავთ, მათი თავდადებული სამსახურის ბუნებრივი შედეგია და არა აკრძალული ნივთიერებების მოხმარების ნიშანი.
თქვენი სიტყვები, რომლებიც არც ფაქტებით და არც ოფიციალური სამედიცინო დასკვნით არ არის გამყარებული, უხეში ცილისწამების ტოლფასია. ეს არა მხოლოდ უსაფუძვლო ბრალდებებია, არამედ იმ ადამიანების ღირსების შელახვა, რომლებიც თავიანთ ჯანმრთელობას რისკავენ ქვეყნის დასაცავად.
თქვენი პასუხისმგებლობის დონიდან მსგავსი განცხადებები დაუშვებელია. ისინი ანგრევს ნდობას იმ ინსტიტუტების მიმართ, რომელთა მხარდაჭერაც და დაცვაც, როგორც სახელმწიფოს მეთაურს, თქვენი მოვალეობაა. პრეზიდენტის პოზიცია – ეს არის პასუხისმგებლობა, რომელიც გულისხმობს თითოეული სიტყვის სიფრთხილეს, განსაკუთრებით ისეთ ვითარებაში, სადაც საქმე ეხება სამართალდამცავი ორგანოების წარმომადგენლებს.
თქვენი ქცევა გვაფიქრებინებს, ვისი ინტერესებით მოქმედებთ. პოლიციის რეპუტაციის დანგრევა ეროვნული უსაფრთხოების საფრთხეს წარმოადგენს. რთულია, არ დავინახოთ, რომ მსგავსი განცხადებები ემთხვევა ქვეყნის გარედან მომდინარე მოწინააღმდეგეთა ინტერესებს, რომლებიც ჩვენი ქვეყნის დესტაბილიზაციით არიან დაინტერესებული.
ნამდვილი დიპლომატია და პოლიტიკური სიმწიფე მოითხოვს, რომ მსგავსი საკითხები გადაწყდეს მხოლოდ კანონის ფარგლებში, ობიექტური და დამოუკიდებელი შემოწმებების საფუძველზე და არა საჯარო, ნაჩქარევი ბრალდებებით. მჯერა, რომ საქართველოს ხალხი თქვენგან, ქალბატონო პრეზიდენტო, პროვოკაციების ნაცვლად, ერთიანობას, მხარდაჭერას და თითოეული სიტყვის პასუხისმგებლობას ელის,”-პატივისცემით პრეზიდენტის ინსტიტუტის მიმართ ზვიად შალამბერიძე,”-ნათქვამია განცხადებაში.
