ზესტაფონში, უცნობი პირები “ქართული ოცნების” ოფისს თავს დაესხნენ-ინფორმაციას ამის შესახებ პარლამენტის რეგიონული პოლიტიკის კომიტეტის თავმჯდომარის მოადგილე, ზვიად შალამბერიძე ავრცელებს.
“ძვირფასო თანამოქალაქეებო!
-ბოლო დღეებში გულისტკივილითა და შეშფოთებით ვაკვირდები ჩვენი ქვეყნის ცალკეულ რეგიონებში და დედაქალაქში აგრესიის და კანონის დარღვევის მიუღებელ გამოვლინებებს. უნდა აღვნოშნო ერთერთი მაგალითი, რომ ქ. ზესტაფონში გვიან ღამით უცნობი პირები თავს დაესხნენ პარტიის ოფისს და დაამსხვრიეს ფანჯრები.
მსგავსი ქმედებები ხშირად ხდება კონკრეტული პირების ემოციებზე მანიპულაციის შედეგად, ეს პირები კი ხელმძღვანელობენ საკუთარი ინტერესებით. ეს პირები ჩვენს მოქალაქეებს იყენებენ უცხო და მტრული სტრატეგიების ინსტრუმენტად, რაც არ შეესაბამება ჩვენი ქვეყნის ეროვნულ ინტერესებს.
ჩვენი ქვეყნის ძალა ყოველთვის იყო ერთობაში, ურთიერთპატივისცემასა და დიალოგის სურვილში. ამიტომ, როდესაც რთული სიტუაციები იჩენს თავს, ყველას მოვუწოდებთ, შეინარჩუნონ სიმშვიდე და მკაცრად დაიცვან კანონით განსაზღვრული ჩარჩოები. ნებისმიერი საკითხი, რომელიც ეხება ხელისუფლებას ან მიმდინარე ვითარებას, შეიძლება და უნდა განიხილებოდეს ცივილურ და კონსტრუქციულ ფორმატში. ჩვენ მზად ვართ მოვუსმინოთ, ავხსნათ და ერთად ვეძიოთ გამოსავალი.
ემოციებზე აყოლით და კანონის დარღვევით, თქვენ საფრთხეს უქმნით არა მხოლოდ საკუთარ რეპუტაციას, არამედ ჩვენი საერთო ქვეყნის სტაბილურობას. გვესმის, რომ არსებული მოვლენები იწვევს დაძაბულობას და შეშფოთებას, თუმცა მნიშვნელოვანია გვახსოვდეს, რომ ასეთ ქმედებებს შეიძლება ჰქონდეს ხანგრძლივი შედეგები. ისინი, ვინც დღეს გაღიზიანებენ და პროვოცირებენ, ხვალ უკვალოდ გაქრებიან, ხოლო თქვენ დარჩებით კანონის წინაშე და საკუთარი ქმედებების შედეგების წინაშე.
ჩვენ გვწამს, რომ არსებული პრობლემების მოგვარება შესაძლებელია და ჩვენი ქვეყანა განაგრძობს სტაბილურ განვითარების გზას. მოგიწოდებთ თითოეულ თქვენგანს, გააცნობიეროთ საკუთარი პასუხისმგებლობა საზოგადოების წინაშე და თავი შეიკავოთ დესტრუქციული და უკანონო ქმედებებისგან.
ჩვენი, როგორც ხელისუფლების, ამოცანა არის თითოეული მოქალაქის კეთილდღეობაზე და უსაფრთხოებაზე ზრუნვა, მიუხედავად პოლიტიკური შეხედულებებისა, დროებითი მღელვარებისა თუ დაშვებული შეცდომებისა. ჩვენ ვაფასებთ თითოეულ თქვენგანს, როგორც ჩვენი დიდი ოჯახის ნაწილს, და ყველა ჩვენი ძალისხმევა მიმართულია სტაბილური, უსაფრთხო და აყვავებული მომავლის შესაქმნელად.
მოდით, ერთად შევინარჩუნოთ ღირსება, პატივისცემა და საერთო სიკეთისკენ სწრაფვა. ჩვენ გვწამს, რომ ამ სირთულეების გადალახვით, ჩვენი ქვეყანა კიდევ უფრო ძლიერი გახდება, ხოლო დიალოგი და ურთიერთგაგება დაგვეხმარება შევინარჩუნოთ ჩვენი დამოუკიდებლობა და დავიცვათ ეროვნული ინტერესები,”-აცხადებს ზვიად შალამბერიძე.
