ამბროლაურის მუნიციპალიტეტის მერიაში მოქალაქეთა სოციალური დახმარების თაობაზე შემოსული განცხადებების საფუძველზე, მერიის სოციალური პროგრამებისა და სოციალური საკითხების შემსწავლელი მუდმივმოქმედი სამუშაო ჯგუფის სხდომა გაიმართა.

როგორც ადგილობრივ ხელისუფლებაში აცხადებენ, მიმდინარე წელს სამუშაო ჯგუფმა 60-ზე მეტი მოქალაქის განცხადება დააკმაყოფილა, რომლებიც შეეხებოდა ბინის ყოველთვიური ქირით უზრუნველყოფას, სოციალურად დაუცველი მოსახლეობის ყოველდღიური უფასო ერთჯერადი კვების პროგრამით სარგებლობას,  ბავშვის უფლებების დაცვისა  და მხარდაჭერის პროგრამაში ჩართვას და სხვა მნიშვნელოვან საკითხებს. 

"2024 წელს სოციალური მიმართულებით მუნიციპალიტეტში მნიშვნელოვანი სიახლეები ხორციელდება. გაიზარდა ბინის ქირით უზრუნველყოფის თანხა და 400 ლარი გახდა, ასევე მოიმატა ხანძრით დაზარალებული ოჯახების დახმარებამ და 10 000-ის ნაცვლად 15 000 ლარს შეადგენს, სიახლეა შშმ ბავშვთა ფინანსური დახმარების მიმართულებით და ერჯერადი ფულადი დახმარების ნაცვლად ყოველთვიურ დახმარებას იღებენ, ასევე მნიშვნელოვანი პროგრამა ხორციელდება ბავშვთა უფლებების დაცვის, ბავშვებისა და მათი ოჯახების მხარდაჭერის, ფიზიკური თუ სოციალური გაძლიერებისთვის. პროგრამის შესაბამისად გაიცემა ერთჯერადი ფულადი დახმარება, რომელიც ითვალისწინებს ბავშვისთვის აუცილებელი ღონისძიებების განხორციელებას.

გარდა ამისა მუნიციპალიტეტი უსახლკარო ოჯახებისთვის იწყებს საცხოვრებელი სახლების მშენებლობას, რისთვისაც პირველ ეტაპზე 100 000 ლარია გამოყოფილი,"-აცხადებენ მერიაში.