თერჯოლის მუნიციპალიტეტის მერი მანუჩარ რობაქიძე ბულგარეთის ქალაქ ალბენაში მკლავჭიდში გამართულ მსოფლიო ჩემპიონატში მონაწილე სპორტსმენებს შეხვდა და მიღწეული წარმატებები მიულოცა.
ჩემპიონატში, რომელიც 10-23 სექტემბრის პერიოდში გაიმართა, თერჯოლის მუნიციპალიტეტში მცხოვრები სპორტსმენებიც მონაწილეობდნენ.
როგორც მერმა აღნიშნა, პირველ ადგილზე გასულ სპორტსმენს გადაეცემა 5000 ლარი, მეორეზე გასულს 4000 ლარი, მესამეზე-3000 ლარი, ფულადი პრიზით დაჯილდოვდება ასევე მწვრთნელი.
მკლავჭიდელმა ლუკა ცინაძემ 23 წლამდელთა შორის მარჯვენა და მარცხენა მკლავის გადაძალვაში დაიკავა პირველი ადგილი, ასევე დიდებს შორის, მარცხენა მკლავის გადაძალვაში დაიკავა პირველი ადგილი.
რევაზ თევდორაძემ დიდებს შორის მარჯვენა მკლავის გადაძალვაში დაიკავა მეორე ადგილი; მარცხენა მკლავში-მესამე ადგილი.
ანზორ ბროკიშვილმა 23 წლამდელთა შორის მარჯვენა მკლავის გადაძალვაში დაიკავა მესამე ადგილი.
მსოფლიო ჩემპიონებს ჯილდოდ ადგილობრივი ბიუჯეტიდან ჯამში 34 500 ლარი გადაეცემათ.