ინფრასტრუქტურის მინისტრი რევაზ სოხაძე, მთავრობის ადმინისტრაციის უფროს ლევან ჟორჟოლიანთან ერთად, რეგიონში მორიგი სამუშაო გასვლის ფარგლებში, დაბა აბასთუმნის განვითარებისთვის მიმდინარე ინფრასტრუქტურულ პროექტებს ადგილზე გაეცნო.
მინისტრმა საავტომობილო გზების დეპარტამენტის წარმომადგენლებთან ერთად, ბაღდათი-აბასთუმნის გზის კაკასხიდი-ზეკარის საუღელტეხილო 16 კმ-იანი (კმ17-კმ33) მონაკვეთის სარეაბილიტაციო სამუშაოები დაათვალიერა.
მონაკვეთი გადის ფაქტობრივად დაუსახლებ ტყიან და ალპურ ზონაში. გზა ზღვის დონიდან საშუალოდ 1700-2100 მ სიმაღლეზე მდებარეობს.
რეაბილიტაციის პროექტის ფარგლებში დაიგება ასფალტ-ბეტონის საფარი, მოეწყობა წყალგამტარი მილები, საყრდენი კედლები და საგზაო ნიშნები.
ბაღდათიდან-აბასთუმნამდე მისასვლელი გზის დღევანდელი ალტერნატივა ბაღდათი-ხაშური-აბასთუმნის გზის მარშრუტი და ქუთაისი-ბაღდათი-საირმე-აბასთუმანი-ბენარას გზიდან საირმე აბასთუმნის ხრეშოვანი გზაა, რომელიც ქუთაისის აეროპორტიდან მანძილს ძალიან ზრდის. ახალი გზის მშენებლობით, ჩრდილოეთ-სამხრეთის კავშირი შენარჩუნდება ისე რომ კურორტზე ავტოტრანსპორტმა არ გაიაროს.
ბაღდათი-აბასთუმნის განახლებული საგზაო მარშრუტით ერთმანეთს უმოკლესი გზით დაუკავშირდება იმერეთის, სამცხე-ჯავახეთისა და აჭარის რეგიონები.
ბაღდათი-აბასთუმნის დამაკავშირებელი საავტომობილო გზის საერთო სიგძე 73.3 კმ-ია. პროექტი ჯამში 10 ლოტისგან შედგება. სამუშაოები სახელმწიფო ბიუჯეტიდან ფინანსდება და მისი ჯამური ღირებულება 65.5 მლნ ლარამდეა.